tabdiliyon ki raah pe chalne to de mujhe
ḳhud ko badal raha huun badalne to de mujhe
bachcha nahin huun main jo bhaTak ja.unga kahin
tanha rah-e-hayat men chalne to de mujhe
jalta hua charagh agar hai mira vajud
phir apne dil ke taaq men jalne to de mujhe
gar meri dastaras men nahin asman ka chand
mahtab-suraton se bahalne to de mujhe
ban ja.unga kiran tiri sub.h-e-jamal ki
tu apne rang ruup men Dhalne to de mujhe
bar-e-gham-e-hayat uTha lunga aur bhi
ai inqilab-e-dahr sambhalne to de mujhe
dam toḌ dengi ḳhud hi purani rivayaten
a.in-e-mulk-e-shauq badalne to de mujhe
mil ja.ega mujhe bhi ujalon ka rasta
zindan-e-tirgi se nikalne to de mujhe
Leave a Reply