Manzar Naqvi
dil ke virane men kuchh phuul tamanna ke khile
ham bujhe log tire baagh men aa ja ke khile
mausam-e-ishq ki barish men naha.e itna
ham kisi chashm-e-tasavvur men bhi murjha ke khile
aarzu hai mire marqad pe uge band kali
tu jab aa.e to tire shauq men lahra ke khule
dasht men shor ḳhamoshi ka suna hai main ne
aable paanv ke so.e hue ghabra ke khule
mausam-e-dard ki andhi men tiri yaad aa.i
ham to hijrat men bhi manzar tujhe chamka ke khule
Leave a Reply