ik din zaban sukut ki puuri bana.unga
main guftugu ko ghair-zaruri bana.unga
tasvir men bana.unga donon ke haath aur
donon men ek haath ki duuri bana.unga
muddat samet jumla zavabit hon tai-shuda
ya.ani ta.alluqat uburi bana.unga
tujh ko ḳhabar na hogi ki main as-pas huun
is baar haziri ko huzuri bana.unga
rangon pe iḳhtiyar agar mil saka kabhi
teri siyah putliyan bhuri bana.unga
jaari hai apni zaat pe tahqiq aj-kal
main bhi ḳhala pe ek theory bana.unga
main chaah kar vo shakl mukammal na kar saka
us ko bhi lag raha tha adhuri bana.unga
Leave a Reply