jo mai-kade men bahakte hain laḌkhaḌate hain
mira ḳhayal hai vo tishnagi chhupate hain
zara sa vaqt ke suraj ne ruḳh jo badla hai
mire vajud pe kuchh saa.e muskurate hain
dilon ki samt pe lafzon ke sang mat phenko
zara si Thes se a.ine TuuT jaate hain
tilism-e-zat ki phaili hai tirgi itni
ki vus.aton ke ujale simaTte jaate hain
sitam-zarifi-e-halat ka karishma hai
bhaTakne vaale mujhe raste batate hain
jinhen ‘hayat’ shu.ur-e-hayat hasil hai
fareb dete nahin hain fareb khate hain
Leave a Reply