phuul kuchle ja rahe the baghban chiḳha kiya
ye zamin roti rahi vo asman chiḳha kiya
jo makan vaale the saare be-ḳhabar sote rahe
raat bhar saḌkon pe koi be-makan chiḳha kiya
jitne zinda log the sab laash ban kar rah ga.e
jab madad ke vaste ik nim-jan chiḳha kiya
jante the ham bhaTak kar hi milengi manzilen
apne hi raste chale phir rah-dan chiḳha kiya
zahiran ham donon us ki jaan ke dushman hue
vo jo rishta tere mere darmiyan chiḳha kiya
jab uTha.i jaani thi avaz zalim ke ḳhilaf
chup rahe ahl-e-zaban ik be-zaban chiḳha kiya
lamha-e-hijran guzarne baad ye aalam raha
vo kahin rota raha aur main yahan chiḳha kiya
ye hua phir baanT li yaron ne saari ka.enat
aur main tanha pas-e-sud-o-ziyan chiḳha kiya
tum ko to ‘afrang’ aana hi nahin tha lauT kar
main tumhara naam le kar ra.egan chiḳha kiya
Leave a Reply