vo ek shaḳhs mire paas jo raha bhi nahin
vo ḳhud ko duur kabhi mujh se kar saka bhi nahin
nigah jis ki miri samt aaj tak na uThi
mire siva vo kisi shai ko dekhta bhi nahin
mire ḳhutut to jhalla ke phaaḌ deta hai
ajiib baat hai purzon ko phenkta bhi nahin
tamam vaqt hai vo mahv-e-guftugu mujh se
ye kaan jis ki sadaon se ashna bhi nahin
hamare siine men chhup jaa.e Dar ke duniya se
vo jis ke lams ne ab tak hamen chhua bhi nahin
jidhar bhi dekhun vahi vo dikha.i deta hai
maze ki baat to ye hai ki vo ḳhuda bhi nahin
Leave a Reply