aab o hava hai barsar-e-paikar kaun hai
mere siva ye mujh men giraftar kaun hai
ik raushni si raah dikhati hai har taraf
dosh-e-hava pe sahib-e-raftar kaun hai
ik ik kar ke khud se bichhadne lage hain ham
dekho to ja ke qafila-salar kaun hai
bosidgi ke khauf se sab uth ke chal diye
phir bhi ye zer-e-saya-e-divar kaun hai
qadmon men saae ki tarah raunde gae hain ham
ham se ziyada tera talabgar kaun hai
phaila raha hai daman-e-shab ki hikayaten
suraj nahin to ye pas-e-kohsar kaun hai
kya shai hai jis ke vaste tuute pade hain log
ye bhiid kyuun hai raunaq-e-bazar kaun hai
ai dil ab apni lau ko bacha le ki shahr men
tu jal-bujha to tera aza-dar kaun hai
ab tak isi khayal se soe nahin ‘salim’
ham so gae to phir yahan bedar kaun hai
Leave a Reply