Fani Badayuni
apni jannat mujhe dikhla na saka tu vaa.iz
kucha-e-yar men chal dekh le jannat meri
saari duniya se anokhi hai zamane se juda
nemat-e-ḳhas hai allah re qismat meri
shikva-e-hijr pe sar kaaT ke farmate hain
phir karoge kabhi is munh se shikayat meri
teri qudrat ka nazara hai mira ijz gunah
teri rahmat ka ishara hai nidamat meri
lo tabassum bhi sharik-e-nigah-e-naz hua
aaj kuchh aur baḌha di ga.i qimat meri
faiz yak lamha-e-didar salamat ‘fani’
gham ki har roz hai baḌhti hui daulat meri
Leave a Reply