Jameel Mazhari
aur kuchh lafz gaḌhun san.at-e-iham ghalat
hai ye ḳhud apni ḳhudi is ka ḳhuda naam ghalat
jumbishen us ki ghalat hain ki ḳhud abru men hai ḳham
us ki ta.amil men ye gardish-e-ayyam ghalat
ye safar kya ki jahan chhanv mili baiTh ga.e
dhuup kitni hi kaḌi ho magar aram ghalat
havas-e-dana agar hai to su-e-dam chalo
havas-e-dana o andeshgi-e-dam ghalat
is se behtar thi kahin gosha-e-aram men niind
ye safar kya ki har ik raah har ik gaam ghalat
nahin afsun hi ko afsane ki manzil ma.alum
ghalat aghaz ka hota hi hai anjam ghalat
‘maz.hari’ chal na sake vaqt-e-subuk-e-gam ke saath
ham-safar pairavi-e-vaqt-e-subuk-gam ghalat
Leave a Reply