Ali Jawwad Zaidi
ankhon men ashk bhar ke mujh se nazar mila ke
nichi nigah uTThi fitne na.e jaga ke
main raag chheḌta huun ima-e-husn pa ke
dekho to meri janib ik baar muskura ke
duniya-e-maslahat ke ye band kya thamenge
baḌh ja.ega zamana tufan na.e uTha ke
jab chheḌti hain un ko gumnam arzuen
vo mujh ko dekhte hain meri nazar bacha ke
didar ki tamanna kal raat rakh rahi thi
ḳhvabon ki rah-guzar men sham.en jala jala ke
duuri ne laakh jalve taḳhliq kar liye the
phir duur ho ga.e ham tere qarib aa ke
sham-e-firaq aisa mahsus ho raha hai
har ek shai ganva di har ek shai ko pa ke
aa.i hai yaad jin ki tufan-e-dard ban ke
vo zaḳhm main ne aksar khaa.e hain muskura ke
meri nigah-e-gham men shikve hi sab nahin hain
ik baar idhar to dekho nichi nazar uTha ke
ye dushmani hai saaqi ya dosti hai saaqi
auron ko jaam dena mujh ko dikha dikha ke
dil ke qarib shayad tufan uTh rahe hon
dekho to sher ‘zaidi’ ik roz gunguna ke
Leave a Reply