duaen mangne se peshtar mat bhuul malika
ki takht-o-taj to bas paanv ki hain dhuul malika
nikal ke tu mahal se roz pursa de sakegi
ye qatl-e-am to hai roz ka maamul malika
unhen tavan men ankhen ada karni padi hain
yahan jo khvab bunne men hue mashghul malika
use sairab hona hai ata ki barishon se
ki dil ki khaak par ugte nahin hain phuul malika
mujhe maalum hain sab sazishen darbariyon ki
mire katbe pe likkha jaega maqtul malika
mohabbat haar ke main lag rahi huun aaj ‘komal’
kisi ujdi riyasat ki koi maazul malika