shab ko miri chashm-e-hasrat ka sab dard-e-dil un se kah jaana
danton men daba kar hont apna kuchh soch ke us ka rah jaana
mai-khane men aana zahid ka phir dar pe thithuk kar rah jaana
saaqi ke isharon ka maston kuchh kaan men sab ke kah jaana
ai yaas na manunga teri bas dil ko ziyada ab na dukha
samjha chuki us ki paheli nigah dukh-dard jo ho vo sah jaana
maana ki faqat mauhum sahi milne ki hamen ik aas to hai
didar to ho le dida-e-tar bahna ho agar tab bah jaana
naale hon ki aahen ai shab-e-gham jab aa gaiin lab par sabr kiya
sahne ko to sab kuchh dil ne saha sahne ki tarah kab sah jaana
buniyad jamane men jin ki kya kuchh na baha tha khun-e-jigar
ai va-asfa un mahlon ka ik chashm-e-zadan men dah jaana
shab ko vo hatheli se un ka sharma ke chhupana ankhon ko
barchhi ka ada ki chal jaana us tir-e-nazar ka rah jaana
utre na kisi ke jab dil men us baat ka hasil kya vaaiz
kahne ko kahi yuun apni si afsos na tu ne kah jaana
ham baagh men nahaq aae the bulbul ki hikayat kya kahiye
minqar ko rakh kar kaliyon par kuchh apni zaban men kah jaana
sun len dil-e-nadan ki baten be-kar bigaden kaam apna
vo zulm karen ham par ki sitam ai ‘shad’ hamen to sah jaana
Leave a Reply