Nuzhat Abbasi
zindagi ke sahra men kuchh nishan nahin milte
raste to milte hain karvan nahin milte
mamta ki chhanv ki qadr jo nahin karte
dhuup un ko milti hai sa.eban nahin milte
umr bhar safar hi to phir nasib hota hai
ghar se jab nikal jaa.en ashiyan nahin milte
apni apni duniya men kho ga.e hain ham donon
tum jahan pe milte ho ham vahan nahin milte
diin ho ki ye duniya ra.egan hi Thahren ham
muft men to ye aḳhir do-jahan nahin milte
faisle ke lamhe men adl karna mushkil hai
chashm-did logon ke kyuun bayan nahin milte
dard ki kitabon men haath ki lakiron men
ham ne pa ke dekha hai gham kahan nahin milte
Leave a Reply