Kis Ko Hai Husn-E-KHuda-Dad Ka Dawa Dekhen

Gopal Mittal

kis ko hai husn-e-ḳhuda-dad ka da.ava dekhen

kis ka chehra nahin minnat-kash-e-ghaza dekhen

jo muqaddar hai vo anjam-e-tamanna dekhen

dil-e-vahshat-zada chal aaj use ja dekhen

dil ye kahta hai ki husn us ka jahan-tab bhi ho

aur phir ye bhi hai ki ham hi use tanha dekhen

aao kuchh jashn-e-shahadat hi men shirkat ho jaa.e

apni khiḌki hi se maqtal ka nazara dekhen

kaun manjdhar men jaa.e sar-e-sahil baiThen

duur se Dubne valon ka tamasha dekhen

ab bhi hota hai vahan zikr hamara ki nahin

aalam us bazm ka ab kya hai zara ja dekhen