Bharat Bhushan Pant
ḳhvab jiine nahin denge tujhe ḳhvabon se nikal
vaqt barbad na kar ra.egan sochon se nikal
dasht-e-imkan men dariya bhi hai badal bhi hain
shart bas itni hai tu apne sarabon se nikal
ek be-rang si tasvir bana le ḳhud ko
rang yaksan nahin rahte kabhi rangon se nikal
varna tu apne hi andar kahin bujh ja.ega
khul ke ab samne aa apne andheron se nikal
shab ne suraj se kaha ye to nahin tera maqam
chal bulandi ki tarah lauT nashebon se nikal
tire hone ka tujhe bhi to ho ehsas koi
ek konpal ki tarah apni hi shaḳhon se nikal
ab vo girdab ki kashti ki kahani na suna
tujh ko sahil pe pahunchna hai to maujon se nikal
ik na ik roz samundar ka safar karna hai
apne ehsas ke mahdud jaziron se nikal
Leave a Reply