hava men tair rahe hain sahab miTTi ke
zamin pe a.enge ik din azaab miTTi ke
mujhe to is se ka.i aadmi banane the
parind bhi na bane dastiyab miTTi ke
falak se nuur ki surat saval utre the
diye zamin ne lekin javab miTTi ke
ye kis jahan men mujh ko guman le aaya
ubhar rahe hain yahan aftab miTTi ke
phir ek roz use chaak par utara gaya
phir us ke ba.ad hue din ḳharab miTTi ke
kiye ga.e the hazaron hi tajrabat magar
badan rahe hain faqat kamyab miTTi ke
ye us ke naqsh kaf-e-pa hain aur lagte hain
zamin pe jaise khile hon gulab miTTi ke
kisi ke vaste sahir charagh the lekin
hava ke haath pe rakkhe the ḳhvab miTTi ke
Leave a Reply