Ghulam Husain Sajid
Thaharne ko hai basti ke dar-o-divar par paani
ki ab patthar men Dhalti ja rahi hai mauj-e-hairani
ḳhayal aata hai shahr-e-arzu ko chhoḌ dene ka
bahut dushvar ho jaati hai jab bhi koi asani
yaqin aaya ki arzan hai mata-e-lutf duniya men
natija hai adu ki qadr karne ka pashemani
musalsal baḌh raha huun jada-e-islam par ab tak
magar ḳhush aa.ega kis ko mira turr-e-musalmani
vahi surat vahi atvar-e-nek-o-bad vahi lahja
vo pal-bhar men kahin se DhunD laaya hai mira saani
mire sheron men bahta hai samundar mere virse ka
ki main gulshan-taraz-e-rang-e-sohban huun na ḳhaqani
juda.i ki kasak miT ja.egi ‘sajid’ mire dil se
agar pahchan le baḌh kar mujhe vo dilbar-e-jani
Leave a Reply