do damon se hai faqat gor-e-ghariban abad
tum hamesha raho ai hasrat-o-arman abad
tujh se ai dard hai qasr-e-dil-e-viran abad
kiya sar-afraz kiya khana-viran abad
jis jagah baith ke roe vo makan duub gae
shahar hone nahin dete tire giryan abad
qais-o-farhad ke dam se bhi ajab raunaq thi
kuchh dinon khuub rahe koh-o-bayaban abad
vahshat-e-dil ye badhi chhod diye ghar sab ne
tum hue khana-nashin ho gaiin galiyan abad
amad-e-qafila-e-dard-o-alam hai sad-shukr
aaj hoti hai sara-e-dil-e-viran abad
mit gae dagh-e-jigar husn-e-rukh-e-yar gaya
kal ki hai baat ki tha kya ye gulistan abad
tere divanon ke jis dasht se utthe bistar
vahshiyon se na hua phir vo bayaban abad
surat-e-shama hua khak-e-badan jal jal kar
ham ne turbat bhi na ki ai shab-e-hijran abad
sohbaten ho gaiin barbad gul-andamon ki
khaak udti hai vahan the jo gulistan abad
siina o dil men khushi se na jagah thi gham ki
ai ‘taashshuq’ ye makan bhi the kabhi haan abad