Ishq Hai Gham Jo Sikhata Hai Fana Ho Jaana

ishq hai gham jo sikhata hai fana ho jaana

dard-e-dil hai jise aata hai dava ho jaana

dars-e-himmat hai na.e rah-rav-e-ulfat ke liye

kanTe paana to mira barahna-pa ho jaana

ishq pyara hai to ne.amat hai gham-e-mahjuri

in ka milna hai mohabbat ka juda ho jaana

hosh la-hasli-e-shikva-e-nakami hai

be-ḳhudi men mira razi-ba-raza ho jaana

ai pashiman-e-sitam ja ki jahan dekh chuka

mera marna tire va.ade ka vafa ho jaana

vasl-e-janan ki tamanna hai to miT ja pahle

yuun mayassar nahin bande ko ḳhuda ho jaana

saans ginta huun tamanna men ki dekhun ‘mani’

gham-e-dil ka adab-amoz-e-fana ho jaana