bala ki dhuup men aise bhi jism jalta raha
badan ka saaya jo apne siron se Dhalta raha
Dhali na sham-e-alam jab talak sahar na hui
bujhe charagh ki lau se dhuan nikalta raha
mili na manzil-e-maqsud is liye bhi mujhe
main har qadam pe naya rasta badalta raha
jahan bhi aankh chura.i safar men suraj ne
koi sitara mire saath saath chalta raha
bas ek umr ganva kar qubuliyat ki ‘nabil’
tamam umr main hathon ko apne malta raha
Leave a Reply