ye dhuup giri hai jo mire lawn men aa kar
le ja.egi jaldi hi ise shaam uTha kar
siine men chhupa shaam ki a.ankhon se bacha kar
ik lahr ko ham laa.e samundar se uTha kar
haan vaqt se pahle hi uḌa degi ise sub.h
rakkhi na ga.i chand se gar shab ye daba kar
ik sub.h bhali si mire nazdik se guzri
main baiTha raha hijr ki ik raat bichha kar
phir sub.h se hi aaj alam dekh rahe hain
yadon ki koi film mire dil men chala kar
phir chaa.e men biscuit ki tarah bhuki si ye shaam
kha ja.egi suraj ko samundar men Duba kar
Leave a Reply