isi bazar tak bas raushni hai
phir is ke ba.ad ik andhi gali hai
har ik avaz men hai ajnabiyyat
har ik chehre pe ik be-chehragi hai
yahan rasman hai sab ki ḳhush-libasi
nazar se be-libasi jhankti hai
hai ghar men ḳhamushi ka ek jangal
isi jangal men kaala naag bhi hai
ajab durgandh hai vatavaran men
kisi talab men machhli mari hai
hamen akash par jaana tha lekin
hamare paanv men rassi bandhi hai
zara lahje ko tum sha.ista kar lo
tumhare pichhe ik laḌki khaḌi hai
vo chehra jo kabhi dekha nahin tha
vo chehra yaad mujh ko aaj bhi hai
abhi hain ḳhvab giile badalon ke
abhi barish men laḌki bhigti hai
Leave a Reply