Abdul Ahad Saaz
kanpti hain honton par
kitni an-kahi baten
gunjte hain kanon men
kitne an-sune naghme
jhankte hain palkon se
ungliyon ke poron tak
khvab kitne an-dekhe
lams an-chhue kitne
naam hai talab jis ka
mustaqil hararat hai
hasrat-o-tamanna ke
an.suon se nam lekin
an-bujhe shararon ki
daimi masafat hai
be-bas arzuon se
dard ki rasai tak
qaid se rihai tak
dhadkanon ki sarhad ke
us taraf bhi imkan hai
jan-o-tan se bahar bhi
zindagi farozan hai
aankh jam bhi jaae to
saans tham bhi jaae to
dil ke tah-nashin jazbe
ruuh men panapte hain
umr sirf mohlat hai
ishq lamha-e-daem
e’tibar baaqi hai
mera gham salamat hai
tera husn hai qaaem
intizar baaqi hai
Leave a Reply