Aaj to Nahin Milta or-Chhor Dariya Ka

aaj to nahīñ miltā or-chhor dariyā kā

tū bhī aa ke sāhil par dekh zor dariyā kā

merā shor-e-ġharqābī ḳhatm ho gayā āḳhir

aur rah gayā baaqī sirf shor dariyā kā

mere jurm-e-sāda par tishnagī bhī hañstī hai

ek ghūñT paanī par maiñ huuñ chor dariyā kā

mor aur bhañvar donoñ mahv-e-raqs rahte haiñ

ye bhañvar hai jañgal kā vo hai mor dariyā kā

Leave a Comment