Rang Ab Yun Teri Taswir Mein Bharta Jaun

Razi Akhtar Shauq

rang ab yuun tiri tasvir men bharta ja.un

tujh pe rang aa.e main jaan se bhi guzarta ja.un

vo diya huun ki havaon se bhi Darta ja.un

fart-e-pindar se phir raqs bhi karta ja.un

ajab ashob diya mere ḳhuda ne mujh ko

ik tamanna-e-masiha.i men marta ja.un

mujh ko jhuTlati rahin vo miri munkir anhken

aur main surat-e-ḳhurshid ubharta ja.un

mere chehre pe na jaao ki mira husn hai ye

apne likkhe hue lafzon men nikharta ja.un

aisi tanha.i ka aalam hai ki har shaḳhs ke paas

ik pazira.i ki hasrat men Thaharta ja.un

‘shauq’ sha.er bhi huun andesha-e-jan bhi hai mujhe

ruuh men shor karun lafz men Darta ja.un