kise sukun mile zindagi ke pahlu men
ravan hai gham ka samundar ḳhushi ke pahlu men
samundaron se kaho mera zarf bhi dekhen
ki ek umr se huun tishnagi ke pahlu men
samajh raha huun jise be-qarariyon ka sabab
qarar aa.e to shayad usi ke pahlu men
ye mehr-o-mah vo duniya talash karte hain
ki raushni ho jahan raushni ke pahlu men
ye kya mazaq-e-junun hai dil-e-junun-agah
usi ko DhunD raha hai usi ke pahlu men
mire qarib na aao ki faisla ho jaa.e
main raushni huun ki huun raushni ke pahlu men
baja ki gum hue hosh-o-havas ai ‘nashtar’
magar jo hosh hai divangi ke pahlu men
Leave a Reply