Ashar Najmi
ham tah-e-dariya tilismi bastiyan ginte rahe
aur sahil par machhere machhliyan ginte rahe
na-tavan shanon pe aisi ḳhamushi ka bojh tha
apne us ke darmiyan bhi siḌhiyan ginte rahe
bazm-e-jan se chupke chupke ḳhvab sab ruḳhsat hue
ham bhala karte bhi kya bas gintiyan ginte rahe
baans ke jangal se ho ke jab kabhi guzri hava
ik sada-e-gumshuda ki dhajjiyan ginte rahe
kis hava ne Das liya hai rang o roghan uḌ ga.e
sehn-e-dil se is makan ki khiḌkiyan ginte rahe
pahlu-e-shab kal isi chehre se raushan tha magar
jaane kitne mausamon ki talḳhiyan ginte rahe
Leave a Reply