Ahmad Mushtaq
bhagne ka koi rasta nahin rahne dete
koi dar koi daricha nahin rahne dete
asman par se mita dete hain taron ka suragh
ret par naqsh-e-kaf-e-pa nahin rahne dete
koi tasvir mukammal nahin hone paati
dhuup dete hain to saaya nahin rahne dete
pahle bhar dete hain saman-e-do-alam dil men
phir kisi shai ki tamanna nahin rahne dete
shahr-e-koran men bhi aina farosh aate hain
be-tajalli koi qarya nahin rahne dete
tur-e-sina ho ki atish-kada-e-soz-e-nihan
raakh rah jaati hai shoala nahin rahne dete
Leave a Reply