Dinesh Kumar
ḳhabar kahan thi mujhe pahle is ḳhazane ki
ghamon ne raah dikha.i sharab-ḳhane ki
charagh-e-dil ne ki hasrat jo muskurane ki
to khilkhila ke hansin andhiyan zamane ki
main sha.iri ka hunar janta nahin be-shak
ajiib dhun hai mujhe qafiya milane ki
vajud apna miTaya kisi ki chahat men
bas itni ram-kahani hai is divane ki
vo ghonsla bhi bana lega ba.ad men apna
abhi hai fikr parinde ko ab-o-dane ki
main ashk ban ke gira huun ḳhud apni nazron se
kahan milegi jagah mujh ko sar chhupane ki
anath bachchon ki aahen saval karti hain
ḳhuda ko kya thi zarurat jahan banane ki
Leave a Reply