Kya Chiz Hai Uzr-E-Lab-E-Izhaar Ka Saya

kyā chiiz hai uzr-e-lab-e-iz.hār kā saaya

iqrār kā saaya kabhī inkār kā saaya

taqdīr gulistāñ kī badal detā hai vo phuul

paḌ jaatā hai jis phuul pe talvār kā saaya

dīvār se dīvār kī duurī are tauba

paḌtā nahīñ dīvār pe dīvār kā saaya

ehsās kī uñglī se Tapakte haiñ sitāre

chubhtā hai mire zehn meñ jab ḳhaar kā saaya

‘qaisar’ mire jazbāt meñ naġhmoñ kī lachak hai

hai fan pe mire gesū-e-ḳhamdār kā saaya

Leave a Comment