Jigar Barelvi
abhi divangi men kuchh kami mahsus hoti hai
abhi ai shiddat-e-gham zindagi mahsus hoti hai
abhi mujh men koi shai aur bhi mahsus hoti hai
abhi idrak-e-vahdat men kami mahsus hoti hai
na jaane zaḳhm-e-dil ki aaj gahra.i kahan pahunchi
phaTa jaata hai siina vo ḳhushi mahsus hoti hai
samaya jaata hai jaise koi rag rag men dil ban kar
yunhi gham men koi shai aur bhi mahsus hoti hai
shab-e-tarik hai virana hai mahviyyat-e-gham hai
ajab aalam men qurbat aap ki mahsus hoti hai
azal se maut ne ab tak ka.i qalib badalva.e
magar jo choT thi dil men vahi mahsus hoti hai
jahan vo baiTh jaa.e gir ke manzil hai vahi us ki
jise har gaam par vamandgi mahsus hoti hai
kisi ki yaad ko har dam bhula.e rakhta huun phir bhi
khaTakti dil men nok-e-ḳhar si mahsus hoti hai
bayaban ki kashish ab le uḌegi dil ke zarron ko
ki har har saans par varaftagi mahsus hoti hai
jahan dil zabt-e-gham se ḳhuun ho jaata hai siina men
vahin kuchh ruuh ko balidgi mahsus hoti hai
agar siine men dil rakhte ho tum to aaj batla do
tumhen bhi meri betabi kabhi mahsus hoti hai
vafur-e-talḳh-kami se ye uqda khul gaya aḳhir
jo hoti hai to gham men zindagi mahsus hoti hai
koi jiine ko samjhe maya-e-ishrat bura kya hai
mujhe to ik ibadat zindagi mahsus hoti hai
ghazal se ai ‘jigar’ andaza kar meri tabi.at ka
ghazal men kaifiyat kuchh ruuh ki mahsus hoti hai
Leave a Reply