ab ke ye baat zehn men Thani hai aur bas
ham ne to apni jaan bachani hai aur bas
nuqsan to hamara hai kachche girenge ham
tum ne to ek shaḳh hilani hai aur bas
us ne ḳharidne hain ka.i saat rang ḳhvab
ham ne siyah niind kamani hai aur bas
ham ne baḌe jatan se jalana hai ik charagh
us ne hava ko ungli dikhani hai aur bas
itni si dastan hai kaghaz ki naav ki
dariya hai aur us men ravani hai aur bas
ham ne kaha ki ashk lahu hai jigar ka dost
us ne kaha ki chhoḌiye paani hai aur bas
Leave a Reply