Pahle To Soch Ke dozakh Mein Jalata Hai Mujhe

pahle to soch ke dozaḳh men jalata hai mujhe

phir vo shishe men mira chehra dikhata hai mujhe

shayad apna hi ta.aqub hai mujhe sadiyon se

shayad apna hi tasavvur liye jaata hai mujhe

bahar avazon ka ik mela laga hai dekho

koi andar se magar toḌta jaata hai mujhe

yahi lamha hai ki main gir ke shikasta ho ja.un

surat-e-shisha vo hathon men uThata hai mujhe

jism minjumla-e-ashob-e-qayamat Thahra

dekhun kaun aa ke qayamat se bachata hai mujhe

zalzala aaya to divaron men dab ja.unga

log bhi kahte hain ye ghar bhi darata hai mujhe

kitna zalim hai miri zaat ka paikar ‘aḳhtar’

apni hi saans ki suuli pe chaḌhata hai mujhe

Leave a Comment