Yasmeen Hameed
raste ki samt aksar dekhte rahte hain kyon
ḳhaak apne faislon ki chhante rahte hain kyon
kyon jala rakhte hain ham apne tajassus ka diya
jis ko pa lete hain us ko DhunDte rahte hain kyon
ham mahak ke isti.are ko badalte kyon nahin
tohfa-e-ḳhushbu gulon se mangte rahte hain kyon
tajraba ham toḌne ka kyon use karte nahin
ranjishon ke da.ere men ghumte rahte hain kyon
lauh-e-na-hamvar par harf-e-vafa to likh diya
us ki babat is qadar ab sochte rahte hain kyon
Leave a Reply