habs jab had se baḌha jism ke virane men
ruuh ne bain kiya dil ke aza-ḳhane men
haa.e vo rang jo ubhra miri be-dhyani se
haa.e vo naqsh jo banta gaya an-jane men
ab koi harf-o-ma.ani ki ḳhabar kya laa.e
ab kahani hi kahan hai mire afsane men
koi gutthi na khuli ek bhi uqda na khula
mas.ala aur ulajhta gaya suljhane men
kaisi ḳhud-rav thi tiri yaad jo aati hi rahi
dar-o-divar dhaḌakne lage kashane men
taq-e-umid se paimana-e-farda ḳhali
tishnagi baTne lagi hai tire mai-ḳhane men
fasl-e-gul men bhi tira chaak gareban na hua
koi ashufta-mizaji nahin divane men
Leave a Reply