Ashfaq Husain
usi zamin usi asman ke saath rahe
jahan ke the hi nahin us jahan ke saath rahe
na.i zamin pe khilate rahe shanaḳht ke phuul
jahan rahe vahan apni zaban ke saath rahe
saja ke nok-e-palak tak virasaton ka jamal
saqafat-e-vatan-e-mezban ke saath rahe
ham apne lamha-e-maujud ke havalon se
ghubar-e-qafila-e-raftagan ke saath rahe
tarashti rahi mauj-e-hava-e-vaqt hamen
chaTan the magar ab-e-ravan ke saath rahe
kisi shikasta kinare se rabt hi na rakha
samundaron men khule badban ke saath rahe
badan pe jamne na di ham ne gard-e-tanha.i
ḳhayal-e-anjuman-e-dostan ke saath rahe
bas is ḳhayal se kuchh is men tera zikr bhi tha
suni-suna.i hui dastan ke saath rahe
Leave a Reply