kahani men chhoTa sa kirdar hai
hamara magar ek me.aar hai
ḳhuda tujh ko sunne ki taufiq de
miri ḳhamushi mera iz.har hai
ye kaise ilaqe men ham aa base
gharon se nikalte hi bazar hai
siyasat ke chehre pe raunaq nahin
ye aurat hamesha ki bimar hai
haqiqat ka ik sha.iba tak nahin
tumhari kahani mazedar hai
ta.alluq ki taj.hiz-o-takfin kar
vo daman chhuḌane ko tayyar hai
paḌosi paḌosi se hai be-ḳhabar
magar sab ke hathon men aḳhbar hai
ye chhuTTi ka din ham se mat chhinna
yahi ham gharibon ka tyauhar hai
use mashvaron ki zarurat nahin
vo tum se ziyada samajhdar hai
Leave a Reply