Waqar Manvi
agar rona hi ab mera muqaddar hai mohabbat men
to daman bhi tumhara ho mire ashkon ki qismat men
savali ho ke main ne tere dar ko baḳhsh di izzat
nahin to kya nahin hai mere daman-e-mohabbat men
pa.e-baḳhshish abhi dariya-e-rahmat josh men aa.e
kam-az-kam ye asar to hai mire ashk-e-nadamat men
pahunch kar un ke sang-e-astan par bhi nahin miTti
vo mahrumi-e-sajda jo likhi hoti hai qismat men
ata ko dekh apni zarf-e-dil ka zikr kya saaqi
ki dariya bhi sama hai zarf-e-dil ki vus.at men
vo aalam yaad hai jab dil khincha jaata tha pahlu se
kashish pahli si kya baaqi nahin lafz-e-mohabbat men
vaqar’ ai kaash meri umr men shamil na ki jaa.e
vo muddat haan vahi muddat jo guzri un ki furqat men
Leave a Reply