Shaz Tamkanat
na mahfil aisi hoti hai na ḳhalvat aisi hoti hai
mire ma.abud kya jiine ki surat aisi hoti hai
bas ik kaifiyyat-e-ḳhud-raftagi tanha.iyan apni
hamen milti hai fursat bhi to fursat aisi hoti hai
ye duniya sar-ba-sar ranginiyon men Duub jaati hai
tiri qamat ki har shai men shabahat aisi hoti hai
dar-o-divar par bas ek sannaTe ki raunaq hai
mire mehman se puchho ghar ki jannat aisi hoti hai
kahan apni siyah-kari kahan ye teri ma.asumi
tujhe dekha nahin jaata nadamat aisi hoti hai
koi dekhe tujhe to az-sar-e-nau zindagi mange
rivayat jhuuT hai qatil ki surat aisi hoti hai
ye majburi, mohabbat bhiik jaisi bhi gavara hai
kabhi din raat ko teri zarurat aisi hoti hai
bichhaḌ kar tujh se milne ki masarrat bhuul jaata huun
ki mil kar phir bichhaḌne ki aziyyat aisi hoti hai
Leave a Reply