Poet
halanki main asir-e-azab-e-safar na tha
ye aur baat hai ki mira koi ghar na tha
din raat bhagte hue lamhon ke darmiyan
main sochta tha koi mira ham-safar na tha
ham bahr-e-zindagi se jo chun chun ke laa.e the
ḳhali sabhi sadaf the kisi men guhar na tha
yuun ḳhaak uḌ rahi hai nigahon ke samne
dasht-e-talab men duur talak koi ghar na tha
barish ki sazishon men hava bhi sharik thi
lekin makin-e-shahr koi ba-ḳhabar na tha
logon ne sangsar kiya is ke bavajud
vo mutma.in tha us ka kaha be-asar na tha
Leave a Reply