Poet
raat hai shahr-e-butan hai aur ham
arzu-e-be-karan hai aur ham
kaun guzra hai sar-e-rah-e-ḳhayal
duur tak ik kahkashan hai aur ham
raat ki Dhalti javani ke rafiq
sirf ik pir-e-mughan hai aur ham
bujh chale hain saare yaron ke charagh
ab charaghon ka dhuan hai aur ham
har zamane men mili haq ko salib
ye qamis-e-ḳhun-chakan hai aur ham
be-sutun taqdir-e-har-farhad hai
ik mazaq-e-ḳhusravan hai aur ham
jis men jur.at ho vo muḌ kar dekh le
ek umr-e-ra.egan hai aur ham
Leave a Reply