Jo Tere Shahr Se Main Dar-Ba-Dar Nahin Hota

jo tere shahr se maiñ dar-ba-dar nahīñ hotā

to merā ishq kabhī mo’atabar nahīñ hotā

ye arsh-o-farsh tirī muTThiyoñ meñ hote band

tū apne haal se gar be-ḳhabar nahīñ hotā

maza to jab hai mire saath saath tū bhī chal

rah-e-vafā meñ akele safar nahīñ hotā

rah-e-hayāt meñ aisā bhī moḌ aatā hai

sharīk-e-hāl koī ham-safar nahīñ hotā

tamām umr nafas se jihād karnā hai

do-chār din meñ to koī bashar nahīñ hotā

isī liye to bayābāñ meñ merā maskan hai

harīf-e-va.ada-shikan jānvar nahīñ hotā

zarūr koī kamī hai ‘niyāz’ jab hī to

jo iztirāb idhar hai udhar nahīñ hotā

Leave a Comment