ye nafraton ka sulagta alaav kaisa hai
ye karvan-e-sahar ka paḌav kaisa hai
lahuluhan hai peshani-e-saba kyunkar
badan pe ahl-e-gulistan ke ghaav kaisa hai
mohabbaton ki ravish men bapa hai raqs-e-sharar
ye shahr-e-ishq vafa men tanav kaisa hai
mata-e-dard ki hai apna mushtarak virsa
miyan-e-ham-nafasan bhed-bhav kaisa hai
simaT rahe hain ujale ufuq ki banhon men
andheri raat ka ye chal-chalav kaisa hai
na ḳhauf-e-kam-nigahi hai na ḳhadsha-e-shab-ḳhun
shu.ur-e-jihat se aari bahav kaisa hai
salib-o-dar ke mausam pe guftugu na sahi
dayar-e-husn ka ab rakh-rakhav kaisa hai
jabin-e-fikr pe zaḳhmon ki kaifiyat kya hai
hujum-e-shauq ka aalam batao kaisa hai
‘shamim’ qimat-e-jins-e-hayat kya Thahri
lahu ka shahr-e-nigaran men bhaav kaisa hai
Leave a Reply