aah duniya sara-e-fani hai
kis qadar muḳhtasar kahani hai
ḳhud ko deta huun muskura ke fareb
dil magar vaqf-e-nauha-ḳhvani hai
mujh se hans-bol len mire sathi
ab koi din ki zindagani hai
mausam-e-gul men vo jo aan milen
ham bhi janen ki rut suhani hai
be-sabab to nahin bahe aansu
aansu aansu men ik kahani hai
ik sarapa ki ranj-o-yas hain ham
dard-e-dil monis-e-javani hai
muskura.un main kis tarah ‘altaf’
taak men daur-e-asmani hai
Leave a Reply