Aah Duniya Sara-E-Fani Hai

aah duniyā sarā-e-fānī hai

kis qadar muḳhtasar kahānī hai

ḳhud ko detā huuñ muskurā ke fareb

dil magar vaqf-e-nauha-ḳhvānī hai

mujh se hans-bol leñ mire sāthī

ab koī din kī zindagānī hai

mausam-e-gul meñ vo jo aan mileñ

ham bhī jāneñ ki rut suhānī hai

be-sabab to nahīñ bahe aañsū

aañsū aañsū meñ ik kahānī hai

ik sarāpā ki ranj-o-yās haiñ ham

dard-e-dil monis-e-javānī hai

muskurā.ūñ maiñ kis tarah ‘altāf’

taak meñ daur-e-āsmānī hai

Leave a Comment