ahmad-rizwan

Khak Dekhi Hai Shafaq-Zar Falak Dekha Hai

khaak dekhi hai shafaq-zar falak dekha hai

zarf bhar teri tamanna men bhatak dekha hai

aisa lagta hai koi dekh raha hai mujh ko

laakh is vahm ko sochon se jhatak dekha hai

qudrat-e-zabt bhi logon ko dikhai ham ne

surat-e-ashk bhi ankhon se chhalak dekha hai

jaane tum kaun se manzar men chhupe baithe ho

meri ankhon ne bahut duur talak dekha hai

raat ka khauf nahin ghatta andhera to kuja

sab tarah-dar sitaron ne chamak dekha hai

ek muddat se use dekh raha huun ‘ahmad’

aur lagta hai abhi ek jhalak dekha hai

More Poems

Leave a Comment