vasl men pher ke munh haa.e kisi ka kahna
ham na manenge na manenge kisi ka kahna
ek dushman hai ki tum sunte ho us ka kahna
ek main huun kabhi hota nahin mera kahna
dilruba kahta hai ai yaar dulara kahna
ek to naam hain do phir tujhe kya kya kahna
ham manate hain tumhen bahr-e-ḳhuda man jaao
maan lo maan lo ai jaan hamara kahna
zeb-e-mahfil bhi ho tum zinat-e-gulshan bhi ho tum
chaman-ara ki tumhen anjuman-ara kahna
ek hi vaar men sar tan se juda kar Daala
vaah ai ḳhanjar-e-saffak tira kya kahna
dekh kar un ko mira shauq ye kahna hai mujhe
tujh ko manzur hai jo kuchh unhen kahna kahna
mujh ko ik jaam pila kar ye kaha saaqi ne
ho agar aur zarurat to dobara kahna
dard-e-dil dard-e-jigar dekhta ja ai saaqi
kya kaha kya kaha phir kahna dobara kahna
tauba karne ka kaha main ne to saaqi ne kaha
kya kaha kya kaha phir kahna dobara kahna
jo bura kahte hain kahne do unhen ai ‘sabir’
haq to ye hai ki mire haq men hai achchha kahna
Leave a Reply