hasin aur us pe ḳhud-bin vo sitam-gar yuun bhi hai yuun bhi
nazara qabza-e-qudrat se bahar yuun bhi hai yuun bhi
jau ye bismil haya se hai to vo majruh dekhe se
nigah-e-naz us qatil ki ḳhanjar yuun bhi hai yuun bhi
jabin us dar pe hai vo dar hai uncha arsh-e-a.azam se
buland auj-e-surayya se muqaddar yuun bhi hai yuun bhi
idhar vo mujh se barham hain udhar mayus-e-nazzara
ki meri umr ka labrez saghar yuun bhi hai yuun bhi
aqidat tujh se bhi hai bai.at-e-dast-e-subu bhi hai
jo saaqi rind hai haqdar-e-kausar yuun bhi hai yuun bhi
miri manzil ka pahla naam duniya dusra diin hai
ki rah-e-ishq mere haq main behtar yuun bhi hai yuun bhi
main ḳhvahir-zada-e-haidar bhi huun shagird-e-haidar bhi
mira mulk-e-suḳhan pe qabza ‘qaisar’ yuun bhi hai yuun bhi
Leave a Reply