kya kahun kitni aziyyat se nikali ga.i shab
haan yahi shab ye miri hijr bana li ga.i shab
pahle zulmat ka parastar banaya gaya main
aur phir meri nigahon se uTha li ga.i shab
raat bhar fat.h vo karti rahi ujiyaron ko
sub.h-dam apne andheron se bhi ḳhali ga.i shab
ta sada mujh men rahen chand sitare raushan
meri miTTi men tabi.at se mila li ga.i shab
ḳhatm hota hi nahin silsila tanha.i ka
jaane kis darja masafat men hai Dhali ga.i shab
fasl maqsud thi ‘sarim’ hamen suraj ki jahan
haif hai un hi zaminon pe uga li ga.i shab
Leave a Reply