ye chalti-phirti si lashen shumar karne ko
bahut hai kaam sar-e-rahguzar karne ko
guzar rahe hain ba-ujlat bahar ke ayyam
paḌa hai raḳht-e-badan taar taar karne ko
gale ki samt mire apne haath baḌhte hain
raha hi kya hai bhala e’tibar karne ko
badan ko chaaT liya hai siyah kaa.i ne
abhi to kitne samundar hain paar karne ko
abhi se chand sitaron ki anhken pathra.i
paḌi hai raat abhi intizar karne ko
samajh men aa na saki ye ada gulabon ki
chaman men aate hain siina figar karne ko
Leave a Reply