Shahryar
aks ko qaid ki parchhain ko zanjir karen
saat-e-hijr tujhe kaise jahangir karen
paanv ke niche koi shai hai zamin ki surat
chand din aur isi vahm ki tashhir karen
shahr-e-ummid haqiqat men nahin ban sakta
to chalo us ko tasavvur hi men taamir karen
ab to le de ke yahi kaam hai in ankhon ka
jin ko dekha nahin un khvabon ki taabir karen
ham men jurat ki kami kal ki tarah aaj bhi hai
tishnagi kis ke labon par tujhe tahrir karen
umr ka baaqi safar karna hai is shart ke saath
dhuup dekhen to ise saae se taabir karen
Leave a Reply